العودة   منتديات تجمعنا المحبه > تجمعنا الأدبيه > قصص - روايات - روايات كاملة - روايات طويله - روايات غرام
التسجيل اجعل كافة الأقسام مقروءة

قصص - روايات - روايات كاملة - روايات طويله - روايات غرام روايات - روايات طويلة - روايات - تحميل روايات - روايات سعودية - خليجية - عربية - روايات اجنبية - اجمل الروايات. -قصص غرامية ، قصة قصيرة ، قصة طويلة ، روايات ، قصص واقعية ، قصص طريفة ، قصص من نسج الخيال ، حكايات,قصص اطفال ,

ياليت كل الرجال مثل مطلق

مطلق , الرجاء , ياليت ياليت كل الرجال مثل مطلق السلام عليكم ورحمة الله وبركاته هذي القصة جاتنني عبر الإيميل ...

إضافة رد
 
LinkBack أدوات الموضوع انواع عرض الموضوع
قديم منذ /29 - 5 - 2009, 2:30 AM   #1

.:: ياليت اليوم تفهمني ::.

ღأوركيداღ غير متواجد حالياً

 رقم العضوية : 26
 تاريخ التسجيل : 8 - 6 - 2008
 المشاركات : 2,915
 النقاط : ღأوركيداღ has a brilliant futureღأوركيداღ has a brilliant futureღأوركيداღ has a brilliant futureღأوركيداღ has a brilliant futureღأوركيداღ has a brilliant futureღأوركيداღ has a brilliant futureღأوركيداღ has a brilliant futureღأوركيداღ has a brilliant futureღأوركيداღ has a brilliant futureღأوركيداღ has a brilliant futureღأوركيداღ has a brilliant future

ياليت كل الرجال مثل مطلق


السلام عليكم ورحمة الله وبركاته

هذي القصة جاتنني عبر الإيميل وحبيت أنقلها لكم
راح انزل اليوم نصفها وبكرة أنزل النصف الثاني

والقصة على لسان صاحبتها...

أنا "أمل"أبيكم تسمعون قصتي ومعاناتي من البدايه للنهايه بشرط تقرونها كلها عشان تعيشون قصتي__وأبي البنات يستفيدون من قصتي كثير..قاعده أكتب لكم قصتي ومعي ولدي ياسر عمره سنتين وقاعده اطالع عيونه وابكي لانه يذكرني بعيون أبوه إللي ماراح انساه طول عمري..
عيشو القصه أول باول_

أنا"أمل"عمري 24سنه عندي أخو واحد وأختين وحده أكبرمني متزوجه"هدى"وثانيه بالمتوسطه أصغر مني
بداية حياتي كان عندي مشكله لاوالله كان بالنسبه لي كابوس خطير يطاردني اسمه"مطلق"
هذا المخلوق الذي ناشب لي في حياتي
مشكلتي ماظن لها حل مشكلتي مع ولد عمي"مطلق"
حاجزيني له من يوم حنا صغار أبوي الله يسامحه عطى عمي كلمه من يوم عمري خمس سنوات وقال:أمل ل"مطلق"__ اللهم لا أسألك رد القضاء ولكن اسألك الطف فيه
وطبعن"الحجز" وعاده عند بعض القبايل أن البنت يحجزونها لولد عمها لين تكبر وتتزوجه وطبعن أنا الضحيه
حيروني لها الغول"مطلق" لاياربي كل شي إلا"مطلق"
ياليتكم بس تعرفونه والله حفله..وجهه كنه افلام كرتون..سبحان من كون هالأنسان على بعضه والله من يشوفه الواحد يموت ضحك مدري كن مكتوب على وجهه نكته!أول ماتشوفه تطري عليك البوكيمونات!!كله على بعضه مسرحيه كومديه تبي تدور فيه شي حلوفيه ماتلقى مستحيل قلبتها يمين ويسار بس مافيه فايده مسكره بوجهي بكل الطرق ..يمكن القلم إللي يحطه بجيبه الأمامي حلو..صحيح يقولون(الرجال مخابر مو مناظر)بس أنا أقول(الرجال مخابر مو من اصحاب المقابر)اللهم لاشماته!
غير شكله الأسطوري .. عندك اسلوبه وطريقة كلامه مايدري وين ربي حاطه..مايفهم حيل "مفهي" مايدري وش السالفه!! مكتوب علامة تعجب فوق راسه لونها أحمر وتأشر!!
غير كذا فاشل بدراسته وسقيط ياخذ السنه بسنتين وانسان مايعرف يتكشخ الكشخه يمين وهو شمال!
المهم طولت سب بهالمسلم .المهم مايناسبني حييل أناوياه تجاه متعاكس
ماكنت أتخيل نهاية دنيتي على وجه"مطلق"ماكنت أتوقع اليوم إللي يجي فيه أهلي ويقلون لي خلاص زواجك بكرى "بمطلق"
ماكنت أتوقع أنا وياه راح نكون في بيت واحد!لا وغرفه وحده لا وسرير واحد..والخافي أعظم!!!!!
لاياربي خذ روحي ولاروحه لامستحيل..أنا أجمل البنات أتزوج"مطلق"أشين الخلق
أنا في كامل اناقتي وفي ثوبي ألأبيض وفي أسعد لحضات حياتي وجالسه في كوشتي..والتفت جنبي مين!!!!"مطلق"
لا ويبتسم بعد أبتسامه عريضه مع اسنانه اللي كنهم صفة شطرنج! ويقرب مني ويمسك يدي! وأصرخ ..لا ..لا ..لا
~~وفجاءه تصحيني أمي من النوم:أمل بسم الله عليك وش فيك? صحيت من النوم وأنا أبكي وتلفت يمين ويسار..وأحمد ربي أنه حلم
الحمد لله أنه مو يوم زواجي قمت من الفراش وجلست أبوس في الأرض وأبوس فراشي
أمي:بسم الله عليك بنتي وش فيك??
طرت طيران على أمي وضميتها وقلت:تكفين يمه تكفين مافيه مجال تغيرون رايكم مستحيل آخذ "مطلق"تكفين أقنعي أبوي!
أمي:أسكتي لايسمعك أبوك..والله لايذبحك..وش فيه"مطلق"على ألأقل محد ضحك عليه!!
أمل:محد ضحك عليه?!ألا أنا كل ماشفته مت من الضحك
أمي:يابنيتي ..بكرى زواجك على ولد عمك..لاتضايقين روحك أستانسي وساعدي نفسك
أمل:بكرى ! ! ! مستحيل! يمه مو كنكم أجلتوه الأسبوع الجاي
??
أمي:خبله أنتي??أنتي تدرين أن يوم زواجك بكرى!
أمل: آه آه آه يمه أتمنى آخذ قدري من الحياة أطول وقت ممكن قبل أقابل خشة"مطلق" من كثر ماآكل حبوب منومه عشان مافكر بديت أنسى!!
جلست أمي تقرى قران علي والدموع على خدها لأن مابيدها حيله الكلمه كلمة أبوي وابوي مستحيل يتراجع..جلست لحالي أنا والهموم
بكرى زواجي!!معقوله!! أحس الموت قرب مني..بكرى زواجي وأنا أتعس أنسانه بدنيا شلون أهرب من الواقع المرير!وش أسوي معقوله أسلم نفسي له وأنا بكامل عقلي!!
(نجوم السماء أقرب له..هين يا مطلق أنا أوريك)
قمت من فراشي وفتحت درج صغير جنب سريري وطلعت البوم صور لي لماكنت صغيره.وفيه صوره لي أنا و"مطلق"يوم كنا صغار مع بعض!!!(بس لو أعرف منهو اللي مصورنا مع بعض الله لايعافيه)
ورجعت بذكرياتي لورى لما كان عمري خمس سنوات..
أيام الخطوبه(ههههههه على خمس سنين)
وكنت دايم أتهاوش معاه(سبحان الله من يومي صغيره ماادانيه)! ! !
بس هو كان يحبني ومايضربني وكان دايم يشتريلي حلويات!(يبي يكسب رضاي)
كانو بيت عمي قدامنا وبجنبهم بيت"أحمد"
"أحمد"حبي ألأول
"أحمد"الطفل المدلل بالحاره
كان عمره6سنوات..دايم يتهاوش معه"مطلق"وصراعات مستمره بينهم طبعن بسببي!!
أنا بس العب مع"أحمد"ونتهاوش مع"مطلق"
مطلق كان يغار من"أحمد"ومره شافني طولت لعب معه..سحبني بشعري بقوه وقال لي:أدخلي ولاأعلم أبوك
أمل:أنقلع مالك دخل
مطلق:أنا زوجك لازم تسمعين كلامي.
تفشلت قدام"أحمد"..ورحت للبيت مسرعه لأمي وقلت لها عن كلام"مطلق"
ضحكت أمي وقالت:أيه يابنتي أنتي زوجته ومن تكبرون بنزوجكم.
استغربت أنا وقلت:يمه بس أنا ماادانيه شكله يضحك
أمي:ماعليك بكرى يكبر ويزين وتساوى خشته..! ! !

~من وقتها وأنا كل يوم تطلع فيه الشمس أركض لبيت عمي وأشوف"مطلق" هي تساوت خشته ولا لا?! !!
بس مافيه فايده كبر وكبرت خشته معاه
نسيت الموضوع ولا أحد جاب لي طاري
-------
كبرت ودخلت المتوسطه وكنا سن المراهقه..(االمراهقه)
وأتذكر يوم من ألأيام..كنا أنا وبنات الفصل متجمعات وكان موضوعنا عن مواصفات زوج المستقبل!! كل وحده قالت إللي عندها ويوم جاء دوري قلت أبيه زي"توم كروز"
هناء ضحكو البنات وكان معنا بنات عمي بنفس الصف وقالو:لايكون قصدك"مطلق"توم !! وجلسو يضحكون..
أستغربت أنا وش دخل"مطلق"
قالت وحده منهم:ليش ماتدرين أن ولد عمنا "مطلق"حاجزك له ومن تكبرون يزوجونكم...
~معقوله يكون صدق!!معقوله أصير مثل مصير أختي"هدى"إللي زوجوها أهلي لولد عمي بالغصب! ! !
طلعت من المدرسه والف سؤال في راسي..رحت للبيت بسرعه مشي لأنه قريب من المدرسه
يوم قربت من البيت..إلاالمح " أحمد"عند باب بيتهم جالس..ياالله من زمان ماشفت هالوجه إللي يفتح النفس..قرب مني والبسمه في وجهه
أحمد:سلام أموله وينك من زمان ماشفناك!ولاعشان كبرتي وصرتي تلبسين عبايه شفتي نفسك علينا?
أمل:لاوالله يا أحمد بس اخوي يهاوشني يقول أنتي كبرتي عيب تلعبين معهم

فجاءه ودون سابق أنذار !!ماطالعت إلا الغبره جايه من بعيد...! ! ! إلاأبو الشباب"مطلق"جاي مسرع وهو إللي يلبق نعوله عندنا..(طبعن هو مايعرف يسولف ولايتكلم إلا إذا فسخ نعوله! ! يقول آخذ راحتي بالكلام أكثر! !!<<<هذي معلومه بسيطه لا أكثر عن الفتى الأسطوري..
المهم وهو اللي يسحب"أحمد"من عند رقبته ويقوله :وش عندك مع بنت عمي??
وأنا إللي أدفه وأقوله:عيب يا"مطلق" أحمد ماسوى شي
مطلق:أقول هذي بعد كم سنه راح تصير زوجتي رح شف لك وحده ثانيه!
أنا هناء عصبت وأنا إللي أعطيه كف على وجهه..دخلت مسرعه للبيت لأن كنت خايفه يجيني الرد على طول..بس الحمد لله ستر الله
رحت لأمي وسألتها:يمه وش سالفة "مطلق" ??وقلت لها وش صار بالمدرسه ووش قال مطلق بعد..
قلت لها:لايكون مخبين عني شي وانا ماني داريه??
هنا أمي فهمتني السالفه وسالفة حجزي ل"مطلق"
أنا صرخت:يمه لا .. مستحيل مطلق!! لايمه أكيد تمزحين..أكيد مسويه معي صادوه!!
قعدت أبكي بكاء هستيري ضمتني أمي وهي إللي تبكي معي
أمي:ياحبيبتي هذا الكلام من زمان..ماتدرين لو أبوك يغير رايه فيه..وبعدين توك صغيره أنسي ياحبيبتي..
أمل:وشو صغيره??تبون تكبروني وتزينوني وتسمنوني وتهدوني له??

قولي يمه من الحين إذا الكلام جد خليني أتلاحق عمري
مابي أصير مثل مصير أختي "هدى"!!
-----مرت الأيام وشهور محد جاب لي طاري الكل مسكر على الموضوع ..أنا كنت أشجع نفسي وأقول مستحيل يعني من سابع المستحيلات آخذه!
جانا خبر أن أهل"أحمد"أنتقلو للخارج بسبب شغل أبوه ضلينا أنا وياه متصلين مع بعض عبر الأيميل وكان دايم يطمني أنه راح يجي ويتزوجني!
--------------------
"مطلق"صار يسير علينا دايم ويجيب لي هدايا (غصب إلا يحببني فيه)صحيح يحبني ويموت فيني..بس القلب مايبيه والعين ماتطيق شوفته
---------------
صحيت من تفكيري العميق على صوت أمي وصورتي أنا و"مطلق"بيدي
فتحت الباب لأمي
قالت لي:ياالله حبيبتي أستعدي الحين بتجي النقاشه وتنقشك..دخلت علي أختي"هدى"وشافت الحزن بعيوني ضمتني وطالعت فيها وقلت: هدى كأن عندك بشرى ساره لي..كني سمعت أنهم أفرجو عني!!سمعت أن"مطلق"أعتق رقبتي لوجه الله!!
أمي و"هدى"قعدو يطالعون لبعض يحسبون أني أنجنيت
مسحت أختي"هدى"على راسي وقالت:ماتدرين يمكن تكوني اسعد انسانه شوفي شلون أنا سعيده مع ولد عمي الحين مع أني كنت مابيه..
طالعت فيها وقلت:مصدقه أني بآخذه نجوم السماء أقرب له!! أختي قعدت تطالع فيني بدهشه! ! !
جتنا النقاشه..ورسمت رسمه حلوه على يديني..رفعت يديني فوق وجلست اطالع فيهم تذكرت أول ماتنقشت في الثانويه كان عندنا حفل تخرجنا في المدرسه وأنا كنت مشاركه فيه..ذاك اليوم كنت مستانسه مره بس للأسف.!رجعت للبيت وسمعت أتعس خبر بحياتي~~~^^
جيت البيت إلا عندنا عمي وعياله..دخلت إلا أمي عندها مرة عمي وأختي
قلبي عورني..دخلت غرفتي طوالي وقفلت على نفسي كأني كنت أهرب من شي!!
صحيت المغرب على صوت باب غرفتي يدق..فتحت وعيوني نوم إلا أمي وأختي وهي إللي تخمني أمي وتبارك لي
قلت بستغراب:وشو يمه????
أمي:مبروك قبل شوي ملكنا لك على ولد عمك "مطلق"
! @! @! @ ! @ ! @ ! @ !
ماصحيت من صدمتي إلا وأنا في المستشفى
ماتتصورون وش كثر أنقلبت حياتي فوق تحت..الدمعه ماجفت من عيوني مااطلع ولاأروح لحد..تخيلو أنتم بموقفي!!انسان ماأداني طاريه أروح وأتزوجه!!!
تمر الأيام وأحس موتي قرب
مرت فكره في بالي قلت مالي إلا أدق عليه وأفهمه أني ماأبيه
أخذت الرقم من جوال أخوي ودقيت عليه في يوم من ألأيام
وجاني ذاك الصوت الجهوري مطلق:الوووووووو?
أمل:السلام عليكم أخوي
مطلق:هلا من معي?
أمل: أنا أمل بنت عمك
مطلق بدهشه:
يؤيؤيؤيؤ زوجتي??
مامداني ملكت عليك تبين تكلميني! لهدرجه ماعندك صبر وأنا أقاطعه:أسمع يا"مطلق"ماني مطولتها معك أنت ولد عمي على عيني وراسي..بس وربي ماأفكر فيك كزوج أنت مثل أخوي..ياخيي مابيك ماحبك أموت ولا آخذك
كنت أنتظر رد قاسي منه بس الولد ساكت!!
وبعد سكوت طويل رد علي :اسمعي يا"أمل"أنتي ماتحبيني يمكن بس أنا أموت بترابك والله يا"امل"أنك عيوني..أدري أنك مستحيه من الزواج بس والله يا"أمل"للحين ماعرفتني! أنا خاش لك مفاجآت في زواجنا!

أمل:تستهبل أنت وخشتك ?وجهك أكبر مفاجئه !!قال مفاجآت قال!
ياخي خل عندك كرامه وأتركني!
رد علي وصوته غير:أمل اسألك بالله ليش ماتبيني??لأني ماني حلو صح??
مابغيت أصدمه حيل وأقول إيه
قلت:غير شكلك ياخي أنت فاشل في كل شي..حنا مانناسب بعض!وصدقني إذا خذيتني بنطلق طوالي
سكر السماعه بوجهي الملعون ماخلاني أكمل!!
--------------------بعدها بأيام ماصار يجينا"مطلق" حتى أخوي استغرب عن سبب أنقطاعه
وحتى أهل الحاره ماصار أحد يشوفه
أنا هنا استانست قلت أكيد أن خطتي نجحت وكرهني وبيتركني..
المهم جاء ذاك اليوم إللي الاقي فيه رساله بجوالي من رقم "مطلق"كاتب فيها:
أوعدك يا"أمل"أني راح أتغير وراح اسوي المستحيل عشان أرفع راسك..وراح تشوفيني بعينك
حبيبك المخلص:مطلق
~حبتك القراده هذا ماأيس مني وش ناوي يسوي?
مضت سنه كامله و"مطلق"لاحس ولاخبر حتى جاء اليوم إللي قالو فيه أن"مطلق"أخذ من العشره الاوائل على المملكه..
الكل تفاجاء وانصدم?
بعدها بشهور جانا خبر أنه تم قبوله بكلية الطيران
أنا هنا فطست ضحك ماأتخيل شكله حسبتها مزحه بس طلع الكلام جد!
بعد شهر جتني مكالمه على جوالي منه
جاني صوته حزين حيل
مطلق:اسمعي "أمل" أنا مابي منك أي كلمه حبيت أقولك بكرى بسافر للخارج بكمل دراستي وراح أرجع وأنا طيار أنشاء الله
كل هذا قسم بالله لعيونك يا"أمل"لعيونك لأنك صدمتيني حيل يوم قلتي أني فاشل!
"أمل"مستحيل أعيش بدونك تكفين أنتظري رجعتي
~~جيت بقاطعه بقوله لو وش ماسويت مابيك لو رجعت ملك مابيك..
قالي :مابي منك أي رد
أحبك..
سكر السماعه بوجهي
-------------------- سافر أبوالشباب للخارج وأهله يبكون على فراقه وأنا أبكي على رداة حظي..وأنا أنتظر هالغول متى يرجع هو وطيارته! ! !
مضت سنين وسنين وأنا أكبر وهمي يكبر__طول هالفترة وأنا أتخيل شكله وهو راجع قلت يمكن يتغير وجهه هناك...مضت أربع سنوات وقربت رجعته للبلد..
أنا شديت حيلي بالدراسه عشان أنسى همي
-------------------- جاء ذاك اليوم إللي وصلت فيه طيارته للبلد عند عمي عشى بمناسبة تخرجه طيار والكل ينتظر"مطلق"
أنا هنا كلي آمال أني أشوف واحد ثاني قلت يمكن أشوف قدامي"براد بيت"
ولا"توم كروز"!! بشوف كيف صار هالطيار!!
وأنا إللي اطل من الدريشه بشوف خشته يمكن تساوت هناك?
وقفت السياره الكشخه عند باب عمي وينزل منها ذاك المسكب بشماغ وأناإللي يخفق قلبي ..ويلف وجهه على بيتنا
آلا هذي هي خشته ماتغيرت..لا وكبرانه بعد....!!
دخل وسلم على أمي وأهلي جتني أمي تقول"مطلق"يبي يشوفك ويسلم عليك
قلتلها: يخسي..ماعندنا بنات ينشافون قبل الزفه!
أمي:عيب عليك هذا زوجك أمشي لاتفشلينا مع الطيار.
جت فكره في بالي¥¥
وأنا أروح أتغطى وأدخل عليه وأمي معي وجلسنا بالمجلس وسكرت علينا الباب أمي وراحت..أنا خفت ورحت انخشيت ورى الكرسي يمه شفته قربلي صرخت وقلت:تكفى أنا مثل أختك تكفى يا "مطلق" أعتق صراحي أنت الف بنت تتمناك مشاء الله مزيون(من جنبها) وكشخه وطيار..حتى بنات عمي ميتين عليك"عاليه"و"سعاد" بس أنا قلت لهم بشاوره وأرد لكم..تكفى ياولد عمي وش قلت??
حط الهدايا على ألأرض وعلامات الحزن على وجهه جاء بيطلع مسرع وأنا إللي أركض وراه وأنزل تحت عند رجوله ابي ابوسهم وأتوسل له يتركني
كنت أبكي بحرقه وأنا أقول:تكفى ياولد العم أتركني
وهو إللي يرفعني من على الأرض والدموع تملى عيونه ويقول بصوت خانقته العبره:تكفين يابنت عمي لاتبوسين رجولي..أنتي "أمل"مكانك فوق الراس مو تحت..لوتبين روحي أعطيك ياها بس إلا هالطلب يا"أمل"
وهو إللي يبوس على راسي يطلع برى مسرع..
-------------------- رحت لغرفتي وأنا أتذكر شكل "مطلق"وهو يبكي ..معقوله كل هذا يحبني!! بصراحه أنا صدمته حيل ..بس شسوي ماأبيه!!
صحيح هو تغير حيل والكل لاحظ صاير على قولتهم جنتل مان..وكشخه وكل العيال يتعلمون منه وصاير لبق بالكلام ومثقف بزياده والكل يضرب له حساب
بس ياربي شسوي ماحبه حاولت أني أحبه بس ماقدرت! (يمكن لأني ماخذه المسأله عناد من يومي صغيره!??)
-------------------- أنا حسبت أنه بعد موقفي راح يكرهني ويتركني بس للأسف!!
بعدها جاني أتعس خبرسمعته!! جاني الخبر أنه حدد زواجنا بعد شهر! ! !
وش قصده شكله بنتقم مني@@! لاأخاف الدعوه شكلها عناد!!
قسم بالله ألف فكره جت في بالي عشان أنحاش من واقعي بس للأسف ماقدرت وصار إللي صار
-------------------- صحيت من تفكيري على صوت أمي..قربت مني ومسحت دموعي إللي على خدي..
أمي: نامي حبيبتي بكرى وراك روحه للكوافيره بدري أنتي عروس لازم تريحين.. ~~~عروس!!?? لاوالله كنكم موديني للمقبره
حاولت أنام بس ماقدرت ودموعي ماوقفت ..
جاء الصباح ودخلو علي أخواتي يبون نروح للكوافيره أنا هنا كني بحلم ساكته وماأتكلم بس دموعي تنزل..طلعت من الكوافيره وكنت في غاية الجمال..كنت اطالع نفسي وأقول ياحسافتي على خشة "مطلق"
طبعن رفضت اسوي زفه أنا وياه عشان محد يضحك عليه وأتفشل!
**جت اللحظه الحاسمه..زفتي عليه في القفص الذهبي
مدري وش فيني جتني رجافه وأم الركب وقعدت أبكي وأصيح تكفون رجعوني!! أمي وأختي قعدو يهدوني أخوي طلع يبكي .أبوي جاء وباس على راسي وقال:الله يوفقك
طالعت فيه وقلت:الله يسامحك طلع ابوي والحزن بوجهه
كنت ماسكه يدين أمي بقوه وأرجف كنت أنتظر أخوف منظر بحياتي أنتظر لحظة دخوله علي~~
دخل علي وأول مالمحت كشرته حامت علي كبدي..قربت من أمي وقلت: لاتتركيني له.
جاء وسلم على أمي ومدري وش قالها وطلعت
أنا بغيت أنجن يوم شفتها طلعت وقعدت أصوت:وين يمه??
طالع فيني وهو يضحك وقالي: أمك راحت خلاص أنتي لي
طالعت فيه بحقد وقلت:تنكت أنت ??رح نادها بسرعه أبيها قعد يضحك مره ثانيه وقال:ياحلو العروس المستحيه?? وأنا أتلفت يمين ويسار أدور العروس المستحيه وأقول بدهشه: مصدق عمرك أنت .?رح ناد أمي
ماطالعت إلا قفل الباب وهو مبتسم سحب المفتاح وقلت الحين يبلعه
وأول ماشفت الوضع كذا وانا أتلفت بدور لي شي بضربه براس قبل لايقرب...
وأول ماشفته قرب وأنا أصرخ:أرجع موبحسن لك إذا قربت!
وإللي قاهرني أنه فاطس ضحك يحسبني أمزح معه!!! فجاءه شال شماغه ونزل بشته..قلت إذا نزل ثوبه والله لصكه بالمزهريه!!
جلس على الكنبه وهو يطالع فيني وعيونه تبي تاكلني!
وأنا شكلي يضحك واقفه بالزاويه وأرتجف..@@
طالع فيني وقال:تعالي طيب اجلسي هنا والله ماراح أقرب لك..

رفضت وضليت جالسه بزاويه قالي وهو يضحك:إلا متى وأنتي كذا??!
ضلينا على هالحال لمدة ساعه كامله وهو مانزل عينه عني يطالعني بنظرات كانت كلها حب!!
قام وقرب مني..وأول ماقرب حطيت يدي على وجهي وطلعت ذاك الكلام إللي كنت شايلته لليلة الزفه وأنا أقول:أنا ماحبك انا مابيك والله خذيتك غصبن علي والله بغيت أنتحر بس عشان ماأتزوجك..مافيه كلمة سب وهجاء ماقلتها بعد ماتعبت وسكت..
طالعت فيه إلا هو منزل عيونه بالأرض ..رفع راسه وكانت نظراته مليانه حزن..قالي: أمل ...تدرين أنك أجمل أنسانه بهالكون??!!
قرب مني ..قلت الحين يضربني ..باس على راسي وطلع برى الغرفه
مادري حسيت أني وحش وقتها بس والله غصبن علي ماأبيه..
جو أمي وأخواتي عندي ضمتني أختي"هدى"وقالت:أنشاء الله عجبك أشوفه حيل مستانس ويقول لأبوي وأخوي أنكم جلستو تسولفون وتضحكون!
استغربت!! بصراحه خفت أنه يعلم ابوي بكلامي بس الحمد لله ستر علي..
ضلينا على هالحال لمدة طويله مانقرب لبعض ..إذا نمت بسرير نام هو على ألكنبه بصاله..وإذا شفته نايم على السرير قبلي..رحت ونمت بصاله..وأتفاجاء في الصباح إلا أنا علي السرير وهو بصاله!
كانت الفله إللي اسكن فيها من أجمل فلل المنطقه..وعندي طباخه وخدامه وسواق بيت كامل متكامل زي البيت إللي كنت أحلم فيه__بس للاسف كان ينقصه الحب المتبادل!!
كنت أتحاشى الكلام معاه وهو حب يخليني على راحتي بس كان هو مايسكت يسولف وينكت وقصص ماتنتهي كنت بس اسمعه من دون ماأناقشه__كانت سوالفه تجذبني بس أنا أبين له العكس..نظرات عيونه كانت تضعفني شوي..بصراحه تصرفاته جدا رائعه على عكس ماتوقعته!
كل صباح أصحى فيه من النوم الاقي هديه على سريري منه..!هدايا فخمه مره أبن الحلال ماقصر معي بشي!بس قلبي هو إللي قصر! ! !
-------------------- سافرنا شهر العسل للخارج"اسبانيا"من يوم أنا صغيره كنت أحلم فيها..مافيه مكان مارحنا له__كل إللي في بالي شريته وهو يدفع وهو مبسوط.!! كان طول الوقت ماسكني ماحب يفارق يدي لحظه وحده! !
ضلينا شهر هناك وبعدين رجعنا لأرض الوطن..الكل يمثل قدام اهله انه سعيد وبالأخص هو!
---------
جاء ذاك اليوم الغريب!!إللي دق فيه جوال"مطلق"
كنت ماره من جنب الغرفه وانا اسمعه يتكلم بصوت عالي ويصارخ!
والمفاجاءه كان يكلم بنت!واسمعه يقول:خلاص يا"نوال"انسيني!
@~@ أنا هنا ماني مستوعبه!منهي المقروده إللي تكلمه !!
حسيت عيوني حمرت معقوله تكون غيره??!!!
لا لا ماأظن..
طلع هو قالي بيروح لصاحبه ونسى جواله''وأجي والاقي في جواله أكثر من خمسين مكالمه ورسايل حب وغرام وعتب كانت من رقم غريب على ماأظن من البنت نفسها!
جواله مايسكت مكالمات ماحبيت اسأله لان مايهمني
في يوم من الأيام كنا جالسين بصاله وكان معاه الاب توب جالس يستخدمه..دق جواله وقالي أنه العمل طالبينه فورا!!
نسى الاب توب مفتوح وأنا أقوم واجلس عليه والاقي إيميله مفتوح..كان معاه بالايميل بنات كثير@@
قريت الرسايل في الوارد كانت كلها بنات يعتبون عليه وعلى غيبته
والاقي رساله من وحده اسمها "نوال"كانت رسالتها حزينه..وكاتبه فيها:يامطلق راح أسوي المستحيل عشان ترجع لي@@
أنا عصبت وشفتها متصله وقتها ودخلت عليها وقلت لها أني زوجته
البنت تفاجاءت وماصدقت!طلبت رقم جوالها عشان أشوف وش سالفتها..وافقت وبدون تردد
دقيت عليها..وردت على صوت وحده مره ناعم وقالت أنها"نوال"
قلت لها وش تبين ب"مطلق"??
قالت لي:من زمان وأنا أتمنى أكلمك__أنا أحب"مطلق"من يوم ماكنت أدرس بالخارج معاه
سألتها:يعني شفتيه وتحبينه??!
قالت:إيه وأموت بعيونه
قلتلها:متأكده شفتيه وتحبينه??
قالت:صوره مليانه عندي
صحيح شكله مو حلو بس والله أنه يملك شخصيه رائعه وعنده صفات تميزه عن غيره البنات إللي كانو يدرسون معي كانو يموتون فيه@@
قلت أنافي نفسي:سبحان الله محد ضايع!
قالت لي:والله أني أحسدك انك زوجته قسم بالله أنك طايحه في كنز ومنتي داريه عنه ومنتي مقدرته!
قلت لها وش دراك أنتي??
قالت:كان يقولي وحنا بالخارج أنه يحبك وحتى لماتزوج صرت آخذ أخباره من زميلنا"خالد"يقولي أنه يشكي له منك أنك ماتحبينه
وكأنه مو متزوج!
آمانه إذا زواجكم فاشل اطلبي الطلاق منه..وأنا راح احطه بعيوني!
أنا هنا مت من القهر..وهالمره أظن أنها"الغيره"!!
وأنا أقعد اسفل فيها وأحذرها أنها تبعد عنه..
سكرت السماعه بوجهها وأنا كلي استغراب !منهي هذي إللي تحب"مطلق"لهالدرجه ! قلت يمكن تكون شينه بعد هي ..ورحت ادور لها صور بالأيميل وأخيرا لقيت لها الصدمه كانت كبيره حييل@@ لقيت صورة وحده حلوه حيل أحلى من الحلى !كنت أحسب مافيه وحده أجمل مني لين شفت صور"نوال"
قلت ألاقيها فرصه وأزعل بيت أهلي واطلب الطلاق
بس أكيد أبوي بيرجعني له قلت مالي إلا اسكت وأخليه أصلن أنا ماأحبه
رحت وفتحت إيميلي القديم وأتفاجئ والاقي"أحمد"متصل وهو بعد تفاجاء فيني لأني قطعت معاه لما تزوجت
قعدنا نسولف مع بعض..هو للحين بالخارج وقالي أنه تزوج مرتين وطلق قال أنه مالقى وحده يحبها وأني مافارقت باله ولا لحظه!
سالني عن أوضاعي وقلت له أني ماني سعيده
قالي اطلبي الطلاق من زوجك وأنا راح أجي طوالي وأتزوجك
استغربت منه..حط الفكره براسي..




..............

للقصة بقية


dhgdj ;g hgv[hg leg l'gr hgv[hx









التعديل الأخير تم بواسطة ღأوركيداღ ; 29 - 5 - 2009 الساعة 2:33 AM
  رد مع اقتباس
قديم منذ /29 - 5 - 2009, 4:10 AM   #2

عَوُدّهَ حَمِيِدَهَ تَأنّقَتُ لهَآ قَدِيِمَاً

همس المشاعر غير متواجد حالياً

 رقم العضوية : 552
 تاريخ التسجيل : 19 - 8 - 2008
 المكان : عالم ببابين .
 المشاركات : 12,020
 النقاط : همس المشاعر has a reputation beyond reputeهمس المشاعر has a reputation beyond reputeهمس المشاعر has a reputation beyond reputeهمس المشاعر has a reputation beyond reputeهمس المشاعر has a reputation beyond reputeهمس المشاعر has a reputation beyond reputeهمس المشاعر has a reputation beyond reputeهمس المشاعر has a reputation beyond reputeهمس المشاعر has a reputation beyond reputeهمس المشاعر has a reputation beyond reputeهمس المشاعر has a reputation beyond repute

افتراضي

القصه تجنننننننن
انتظرك تكمليهآآ
مشكوره حبيبتي
ويعطيك العافيه ...!~








  رد مع اقتباس
قديم منذ /29 - 5 - 2009, 4:13 AM   #3

.:: ياليت اليوم تفهمني ::.

ღأوركيداღ غير متواجد حالياً

 رقم العضوية : 26
 تاريخ التسجيل : 8 - 6 - 2008
 المشاركات : 2,915
 النقاط : ღأوركيداღ has a brilliant futureღأوركيداღ has a brilliant futureღأوركيداღ has a brilliant futureღأوركيداღ has a brilliant futureღأوركيداღ has a brilliant futureღأوركيداღ has a brilliant futureღأوركيداღ has a brilliant futureღأوركيداღ has a brilliant futureღأوركيداღ has a brilliant futureღأوركيداღ has a brilliant futureღأوركيداღ has a brilliant future

افتراضي

الله يعافيك
نورتي يالغلا








  رد مع اقتباس
إضافة رد

مواقع النشر (المفضلة)

الكلمات الدلالية (Tags)
مطلق, الرجاء, ياليت

جديد مواضيع القسم قصص - روايات - روايات كاملة - روايات طويله - روايات غرام


الذين يشاهدون محتوى الموضوع الآن : 1 ( الأعضاء 0 والزوار 1)
 
أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة
Trackbacks are متاحة
Pingbacks are متاحة
Refbacks are متاحة


المواضيع المتشابهه
الموضوع كاتب الموضوع المنتدى مشاركات آخر مشاركة
من هو مطلق مطلق النار على الأمريكيين ● н σ d σ α صحيفة سبق - sabq - حافز المطور - اخبار حافز - pht. - عاجل - عكاظ 0 14 - 10 - 2014 7:32 PM
وظائف خالية ليوم الخميس 22-6-1434 - وظائف خالية اليوم الخميس 2-5-2013 ♥ •ӎ وظيفة.كوم | وظائف حكومية و توظيف مباشر - وظائف نسائية - Women jobs 1 2 - 5 - 2013 9:58 PM
توبيكات مطلق النومسي , توبيكات الشاعر مطلق النومسي 2010 , توبيكات قصائد الشاعر مطلق النومسي 2010 الهَنوُف توبيكات - توبيكات ماسنجر - توبيك ماسنجر 4 10 - 9 - 2012 7:32 AM
المانجو واللوز والجزر والبطاطا تزيد من خصوبة الرجال-فوائد الفواكه على خصوبة الرجال-خصوبة الرجال الهَنوُف منتدى الطب - اسباب - علاج - الوقاية - ارشادات - نصائح - Medicine 7 16 - 10 - 2011 3:15 AM
وسائط - ياليت تدري كم بصدري ياليت ؟؟ mms ● н σ d σ α مسجات رومنسية - وسائط حب - رسايل جوال- وسائط mms - موبايلي - sms 1 13 - 8 - 2010 1:37 AM


الساعة الآن 10:02 AM



Powered by vBulletin® Copyright ©2000 - 2017, Jelsoft Enterprises Ltd.
Search Engine Friendly URLs by vBSEO TranZ By Almuhajir
ماشاء الله تبارك الله ماشاء الله لاقوة الا بالله , اللهم اني اسالك الهدى والتقى والعفاف والغنى

Security team

Privacy Policy